सावकारांच्या त्रासामुळे घेतला टोकाचा निर्णय
क्राइम ब्लास्ट ब्यूरो
माझ्या आईवर आणि भावावर कर्ज झाले आहे..कर्ज देणारे खूप त्रास देत आहेत. त्यामुळे मी आत्महत्या करीत आहे…
दुपारी अडीचला असे व्हॉटस अॅप स्टेटस ठेवून शिरपूर शहरातील क्रांतीनगर येथील बंटी धनगर या युवकाने तापी नदीत उडी टाकली. सावकारांच्या जाचामुळे कंटाळून त्याने हा टोकाचा निर्णय घेतल्याचे दिसून येत असून अवैध सावकारी आणखी किती जणांचे बळी घेणार असा प्रश्न उपस्थित केला जात आहे.
बंटी धनगर याने तापी नदीत उडी घेतांना काहींनी प्रत्यक्ष पाहिले. त्यापूर्वी दुपारी अडीचला त्याने सावकारांच्या त्रासामुळे जीव देत असल्याचे व्हॉटसअॅप स्टेटस ठेवले होते. काहींनी त्याला फोन करुन आत्महत्येच्या निर्णयापासून परावृत्त करण्याचा प्रयत्नही केल्याचे कळते. मात्र सर्वांना झुगारुन देत त्याने आपला निर्णय खरा ठरवला.
प्राप्त माहितीनुसार, बंटी धनगर याच्या वडिलांचे निधन झाले आहे. आई, दोन भाऊ व एक बहीण अशा परिवारातील बंटीच्या मोठ्या भावाने काही जणांकडून कर्ज घेतले होते. प्रचंड व्याजदर लावल्यामुळे कर्जाची रक्कम वाढत गेली. संशयित सावकार भावाला मारहाण करुन वसुली करु लागले. त्यामुळे भावाने काही दिवसांपूर्वी शिरपूर सोडले. नंतर सावकारांनी आपला मोर्चा बंटीकडे वळवला. त्यालाही धमकावणे सुरु झाले. त्यांच्या त्रासाला वैतागून बंटी धनगर याने हा निर्णय घेतल्याची चर्चा आहे.
