क्राइम ब्लास्ट ब्यूरो
स्विफ्ट डिझायर कारमधून मुंबईला गांजा घेऊन जाण्याचा बेत सांगवी पोलिसांच्या धडाकेबाज कारवाईमुळे उधळला गेला. सहायक पोलिस निरीक्षक सुरेश शिरसाठ यांनी सहकार्यांच्या मदतीने गांजाची तस्करी करणार्या दोघांच्या मुसक्या आवळल्या. मुंबईच्या मुलूंड भागातील रहिवासी असलेल्या दोघांना ताब्यात घेतले असून त्यांच्याकडून 20 किलो गांजा आणि कार असा सहा लाख 97 हजार रुपये किंमतीचा मुद्देमाल जप्त करण्यात आला.
गांजाच्या वाहतुकीबाबत सांगवी पोलिस ठाण्याचे सहायक निरीक्षक सुरेश शिरसाठ यांना माहिती मिळाली होती. त्यांनी सहकार्यांसह हाडाखेड येथील सीमा तपासणी नाक्यावर नाकाबंदी केली. मध्यप्रदेशाकडून शिरपूरच्या दिशेने भरधाव जाणार्या मारुती स्विफ्ट डिझायर (एमएच 03, सीपी 5863) ला संशयावरुन पोलिसांनी थांबवले. वाहनाची झडती घेतली असता चालकाच्या मागील सीटवर पांढर्या पोत्यात गुंडाळलेला गांजा आढळला. त्याचे वजन 19 किलो 700 ग्रॅम भरले.गांजा व कारची एकूण किंमत सहा लाख 97 हजार रुपये आहे.
संशयितांमध्ये स्विफ्टचालक रज्जाक मेगदाद शेख (वय 54, रा.सिंधी कॉलनी, मुलूंड कॉलनी, मुंंबई) व विनोद रमेश शर्मा (वय 33, रा.मुलूंड पश्चिम, मुंबई) यांचा समावेश आहे. संशयित गांजा कोठून व कोणासाठी घेऊन चालले होते याचा तपास पोलिस करीत आहेत. पोलिस अधीक्षक संजय बारकुंड, अपर अधीक्षक किशोर काळे, उपविभागीय पोलिस अधिकारी अन्साराम आगरकर यांच्या मार्गदर्शनाखाली सहायक निरीक्षक सुरेश शिरसाठ, उपनिरीक्षक सुनील वसावे, हवालदार संजय सूर्यवंशी, पवन गवळी, मंगेश मोरे, जाकिर शेख, संदीप शिंदे, सागर ठाकूर, मनोज नेरकर, शिवाजी वसावे, जयेश मोरे, भगवान गायकवाड, कृष्णा पावरा, संतोष पाटील, मनोज पाटील, इसरार फारूकी यांनी ही कारवाई केली.
