वकीलही सापडला
क्राईम ब्लास्ट ब्यूरो
कृषी उत्पन्न बाजार समितीच्या निवडणुकीत नुकत्याच निवडून आलेल्या संचालकांच्या बाजूने निकाल देण्यासाठी 30 लाख रुपयांची लाच स्विकारताना नाशिक येथील सहकारी संस्थांचे जिल्हा उपनिबंधक सतीश भाऊराव खरे (वय 57) व खाजगी वकील शैलेश सुमतीलाल साबद्रा (वयब32) यांना नाशिक येथील अँटी करप्शन ब्युरो पथकाने रंगेहाथ पकडले.
तक्रारदार 40 वर्षीय पुरुष नाशिक जिल्ह्यातील एका कृषी उत्पन्न बाजार समितीच्या निवडणुकीत नुकतेच निवडून आले आहेत. त्यांच्या निवडीला विरोध करणारी तक्रार जिल्हा उपनिबंधक यांच्याकडे दाखल करण्यात आली होती. त्या दाव्यात तुमच्या बाजूने निकाल हवा असेल तर 30 लाख रुपये द्यावे लागतील अशी मागणी सतीश खरे व शैलेश साबद्रा यांनी केली. त्याबाबत संचालकांनी नाशिक येथील अँटी करप्शन ब्यूरोशी संपर्क साधून तक्रार दिली. लाच देण्यासाठी खरे याने संचालकांना त्याच्या कॉलेज रोड येथील राहत्या घरी बोलावले. तेथे वकील साबद्राही हजर होता. त्यांनी रक्कम स्वीकारताच अँटी करप्शनच्या पथकाने छापा टाकून दोघांना रंगेहाथ पकडले.
अँटी करप्शन ब्युरोच्या अधीक्षक श्रीमती शर्मिष्ठा घारगे-वालावलकर, अपर अधीक्षक नारायण न्याहाळदे, वाचक उपअधीक्षक नरेंद्र पवार यांच्या मार्गदर्शनाखाली पोलिस उप अधीक्षक अभिषेक पाटील, सहायक उपनिरीक्षक सुकदेव मुरकुटे, पोलिस नाईक मनोज पाटील, अजय गरुड यांनी ही कामगिरी बजावली.
