अंगावर मारहाणीच्या खुणा, रक्ताचे डाग
संदीप जमादार
क्राइम ब्लास्ट ब्यूरो
शिरपूर शहरातील वाल्मीक नगर भागात राहत्या घरात युवकाचा संशयास्पद मृत्यू झाल्याची घटना 23 एप्रिलला दुपारी घडली.
राजू सुदाम कोळी (वय 32) असे मृताचे नाव आहे. तो चार भाऊ आणि आईसह राहतो. 23 एप्रिलच्या दुपारी लहान भाऊ गणेश त्याला उठवण्यासाठी गेला. मात्र राजू उठला नाही. गणेशने परिसरातील लोकांना माहिती दिली. त्यांनी येऊन खात्री केली असता त्याचा मृत्यू झाल्याचे निष्पन्न झाले.
घटना घडली त्यापूर्वी राजुचे भाऊ पानसेमल येथे गेले होते. गणेशने माहिती दिल्यावर सर्वजण तातडीने घरी परतले. त्यांनी राजुचा मृतदेह उपजिल्हा रुग्णालयात दाखल केला.
पोलिसांनी उपजिल्हा रुग्णालयात मृतदेहाचा पंचनामा केला. राजुच्या मानेवर, कानावर व पाठीवर मारहाणीच्या खुणा आढळल्या. रक्ताचे डागही दिसून आले. त्यामुळे त्याचा मृत्यू घातपाती असल्याची शक्यता वर्तवण्यात आली.
त्याच्या भावांनी दिलेल्या माहितीनुसार, काहीजण तीन चार दिवसांपासून त्यांच्या घरी येऊन राजुला धमकावत होते. पोलिसांनी आकस्मिक मृत्यूची नोंद केली.
