तरडी येथे गळा आवळून खून

क्राईम ब्लास्ट ब्यूरो

ओढणीने हात बांधल्यानंतर गळा आवळून पुरुषाचा खून केल्याची खळबळजनक घटना शिरपूर तालुक्यातील तरडी गावात घडली.
तरडी शिवारात गोविंद हिरालाल परदेशी यांचे गट नंबर 214 मध्ये शेत आहे. त्यात त्यांनी मक्याची लागवड केली आहे. 24 फेब्रुवारीला त्यांचे चुलतभाऊ मोतीलाल बाबूलाल परदेशी शेतात गेले होते. दुपारी बाराला त्यांना गोविंद परदेशी यांच्या शेतात अनोळखी पुरुष उताणा पडलेला दिसला. त्यांनी जवळ जाऊन पाहिले असता तो मृत झाल्याचे दिसून आले.

परदेशी यांनी तातडीने थाळनेर पोलिस ठाण्यात माहिती दिली. थाळनेरचे सहायक पोलिस निरीक्षक उमेश बोरसे तातडीने घटनास्थळी दाखल झाले. त्यांनी निरीक्षण केल्यावर मृताचे दोन्ही हात ओढणीने पाठीमागे बांधले असल्याचे दिसून आले. मृताला ओढणीने गळा आवळून ठार केल्याचा प्राथमिक अंदाज आहे.

मृत पुरुषाची ओळख पटू शकली नाही. त्याचा अन्यत्र खून करून मृतदेह लपवण्यासाठी शेतात फेकल्याचा संशय आहे. मृत कोण, कुठला, त्याचा खून कुठे झाला, कोणी केला असे अनेक प्रश्न या प्रकरणामुळे उपस्थित झाले आहेत. मोतीलाल परदेशी यांच्या फिर्यादीवरून अज्ञात संशयिताविरोधात खुनाचा गुन्हा दाखल करण्यात आला आहे.