क्राइम ब्लास्ट ब्यूरो
स्टेट बँकेत कर्ज भरण्यासाठी जाणार्या प्रौढ नागरिकाच्या पिशवीला ब्लेड मारून 51 हजार रुपये चोरुन नेल्याची खळबळजनक घटना 22 फेब्रुवारीला दुपारी घडली. बोअर मशीनसह ट्रॅक्टर विकून संबंधिताने या रकमेची तजवीज केली होती.
शहरातील करवंद नाक्यावरील हुडको स्कीममध्ये अरुणावती बिल्डींगमध्ये राहणार्या सुधाकर विठ्ठल दोरीक यांच्यासोबत हा प्रकार घडला. 51 वर्षीय दोरीक यांचा बोअरिंग मशीनचा व्यवसाय होता. त्यासाठी त्यांनी स्टेट बँकेकडून कर्ज घेतले होते. मात्र प्रकृतीच्या कारणामुळे दोरीक यांनी व्यवसाय बंद करण्याचा निर्णय घेतला. बँकेचे कर्ज फेडण्यासाठी त्यांनी बोअर मशीन व ट्रॅक्टर विकले. त्यातून मिळालेले 76 हजार 500 रुपये घेऊन ते 22 फेब्रुवारीला दुपारी स्टेट बँकेत जात होते. करवंद नाका येथून रिक्षात बसून गुजराथी कॉम्प्लेक्सजवळ उतरल्यानंतर त्यांना पिशवीला ब्लेडसारख्या धारदार हत्याराने कापल्याचे लक्षात आले.त्यांनी पिशवी उघडून पाहिली असता 51 हजार 500 रुपयांचे बंडल लंपास झाल्याचे आढळले. त्यांच्या शेजारी रिक्षात बसलेल्या महिलेने हे कृृत्य केल्याचा संशय आहे. शिरपूर पोलिस ठाण्यात उशिरापर्यंत गुन्हा दाखल झालेला नव्हता.
