क्राईम ब्लास्ट ब्यूरो
लाचलुचपत प्रतिबंधक विभागाचा अधिकारी आणि क्राईम रिपोर्टर असल्याचा बनाव करून कंत्राटी कर्मचारी महिलेकडून शरीर सुखाची मागणी करणाऱ्या दोन संशयितांविरुद्ध पोलिसांनी गुन्हा दाखल केला.
महिलेस धमकी देऊन आधी 45 हजार रुपयांची खंडणी संशयितांनी वसूल केली होती. त्यानंतर त्यांची नजर तिच्या शरीराकडे वळली. संभाव्य शोषणाचा धोका ओळखून तिने पोलिसांत धाव घेतली.
संबंधित महिला जिल्हा परिषदेची कंत्राटी कर्मचारी आहे. एका पंचायत समितीमध्ये कार्यरत असतांना सात ते 15 ऑक्टोबरदरम्यान संशयित महेंद्र सोनवणे व राजेंद्र निकम यांच्यासह एकाने तिच्या कर्तव्याच्या जागी जाऊन तिच्या हातात एक हजार रुपये दिले. या घटनेचे व्हिडीओ शूटिंग त्यांनी केले. सोनवणे याने आपण लाचलुचपत प्रतिबंधक विभागाचे अधिकारी असल्याचे सांगितले तर निकम याने आपण क्राईम रिपोर्टर असल्याचा बनाव केला. कारवाई आणि बदनामीची भीती दाखवून त्यांनी महिलेकडून 45 हजार रुपयांची खंडणी उकळली. त्यानंतर तिच्याशी अंगलट करून विनयभंग करीत शरीर सुखाची मागणी केली. त्यामुळे महिलेने जळगाव जिल्हापेठ पोलिस ठाण्यात गुन्हा दाखल केला. उपनिरीक्षक प्रदीप चांदेलकर तपास करीत आहेत.
