क्राईम ब्लास्ट ब्यूरो
स्वातंत्र्याच्या अमृत महोत्सवानिमित्त व क्रांती दिनाचे औचित्य साधून येथील आर.सी. पटेल शैक्षणिक संकुलातर्फे शहरातून भव्य मिरवणूक काढण्यात आली. विविध सजीव देखावे आणि झाकी यांचा समावेश असलेल्या मिरवणुकीने शिरपूरकर नागरिकांचे लक्ष वेधून घेतले.
शहरातील पाताळेश्वर मंदिराजवळ हुतात्मा चौकात हुतात्मा स्मारकावर प्रांताधिकारी प्रमोद भामरे, तहसीलदार आबा महाजन, माजी उपनगराध्यक्ष भूपेशभाई पटेल, राजगोपाल भंडारी, पोलीस निरीक्षक रवींद्र देशमुख यांच्यासह शिरपूर एज्युकेशन सोसायटीच्या पदाधिकाऱ्यांनी पुष्पचक्र वाहून शहिदांना मानवंदना दिली. त्यानंतर पटेल संकुलातील विविध शाळांचा समावेश असलेल्या मिरवणुकीला हिरवी झेंडी दाखवून सुरुवात झाली.
राजमाता जिजाऊ, छत्रपती शिवराय, महात्मा फुले, महात्मा गांधी, सावित्रीबाई फुले, सरदार पटेल, बिरसा मुंडा, खाज्या नाईक यांच्यासह देशभरातील विविध महापुरुषांचे वेशभूषा केलेले विद्यार्थी, शोभिवंत घोडे, सजवलेले रथ यांचा समावेश मिरवणुकीत होता.
महाराष्ट्रातील लेझीम, गुजराथचा गरबा, बिहारची छट पूजा यासह पश्चिम बंगाल आदी राज्यातील वैशिष्ट्यपूर्ण नृत्य आणि लोकसंस्कृतीची झाकी सादर करण्यात आली. ती पाहण्यासाठी रस्त्याच्या दोन्ही बाजूंना नागरिकांनी मोठी गर्दी केली होती.
मिरवणुकीच्या मार्गावर पोलिसांनी चोख बंदोबस्त ठेवला. शहरातील प्रमुख मार्गावरून गेल्यावर आर.सी.पटेल संकुलाच्या मुख्य प्रशासकीय इमारतीमध्ये मिरवणुकीचा समारोप झाला.
