क्राईम ब्लास्ट ब्यूरो
पत्नीच्या चारित्र्यावर संशय घेऊन तिचा छळ करून आत्महत्येस प्रवृत्त केल्याच्या संशयावरून नायब तहसीलदार गोपाल साहेबराव पाटील यांच्याविरोधात पोलिसांनी गुन्हा दाखल केला.
धुळे शहरातील देवपूरमधील शिवनेरी कॉलनीत प्लॉट नंबर 12 मध्ये राहत्या घरात 27 जुलैला सकाळी चित्रलेखा गोपाल पाटील (वय 36) यांनी आत्महत्या केली. घराच्या किचनमध्ये ओढणीने गळफास लावून त्यांनी आत्महत्या केल्याचे प्रथमदर्शनी दिसून आले.
चित्रलेखा पाटील यांचे वडील लोटन पांडुरंग थोरात धुळे येथे देवपूरच्या वीटभट्टी परिसरात राहतात. त्यांनी देवपूर पोलिस ठाण्यात फिर्याद दिली. त्यांचे जावई तथा साक्री तहसील कार्यालयात नायब तहसीलदार असलेले गोपाल पाटील पत्नी चित्रलेखा हिचा चारित्र्यावर संशय घेऊन छळ करीत होते. त्याला कंटाळून तिने आत्महत्या केली. गोपाल पाटील यांच्याविरोधात पोलिसांनी गुन्हा दाखल केला. पाटील दाम्पत्याला दोन मुले आहेत.
