दारूबंदी असलेल्या गुजरात राज्यात दारू वाहून नेणाराट्रक पोलिसांनी एक जुलैला जप्त केला. या कारवाईत एकूण 43 लाख 77 हजार 120 रुपये किमतीचा मुद्देमाल पोलिसांनी ताब्यात घेतला.
नंदुरबार जिल्ह्याचे पोलीस अधीक्षक पी. आर. पाटील यांना साक्रीकडून गुजरात राज्यात मद्य तस्करी होणार असल्याची माहिती मिळाली होती. त्यांच्या आदेशावरून स्थानिक गुन्हे शाखेचे पोलीस निरीक्षक रवींद्र कळमकर, सहाय्यक निरीक्षक संदीप पाटील, हवालदार दादाभाई मासूळ, जितेंद्र ठाकूर, जितेंद्र तोरवणे, तुषार पाटील, राजेंद्र काटके, आनंदा मराठे यांनी विसरवाडीकडून जाणाऱ्या नागपूर-सुरत राष्ट्रीय महामार्गावर असलेल्या ॲपल हॉटेलजवळ सापळा रचला. संशयित अशोक लेलँड कंपनीचा ट्रक (जीजे 06 एझेड 3560) साक्रीकडून येत असताना त्याला पोलिसांनी थांबण्याचा इशारा केला. पोलिसांना पाहून काही अंतरावर ट्रक उभा करून संशयित पळून गेला. पोलिसांनी ट्रकची झडती घेतली असता रॉयल क्लासिक व्हिस्कीची 60 खोकी, रॉयल ब्ल्यू व्हिस्कीची 518 खोकी आढळली. ट्रकसह मुद्देमालाची एकूण किंमत 43 लाख 77 हजार 120 रुपये आहे. प्रथमदर्शनी चौकशीत ट्रकदेखील चोरीचा असल्याचे आढळले. अज्ञात संशयता विरोधात पोलिसांनी गुन्हा दाखल केला. कारवाई करणाऱ्या पोलिसांचे अधीक्षक पी.आर.पाटील यांनी अभिनंदन केले. मद्यसाठ्याच्या मूळ मालकाचा शोध सुरू असल्याची माहिती पोलिसांनी दिली.
