क्राईम ब्लास्ट ब्यूरो
शिरपूर : तालुक्यातील वाडी येथील रहिवासी महिलेने गिधाडे येथील तापी पुलावरुन दहा वर्षाच्या मुलाला सोबत घेऊन नदीत उडी टाकून आत्महत्या केली. ही घटना 16 जूनला दुपारी घडल्याचा संशय आहे. आत्महत्येचे कारण समजू शकले नाही.
योगिता रवींद्रसिंग गिरासे (वय 30) असे मृत महिलेचे नाव आहे. तिचे माहेर शहादा तालुक्यातील डोंगरगाव येथील आहे. ती काही दिवसांपूर्वी मुलास सोबत घेऊन माहेरी गेली होती. 16 जूनला ती वाडी येथे सासरी परत जाण्यासाठी निघाली. परंतु ती सासरी पोहचलीच नाही. गिधाडे येथील पुलावरुन मायलेकांना उडी टाकतांना काहींनी पाहिले. ते घटनास्थळी धावून गेले. तेथे पुलावर एक बॅग पडली होती. बॅगमध्ये एका वहीवर तेजस राजपूत असे नाव असून मोबाईल नंबरही लिहिला होता. त्यावर संपर्क साधला असता योगिता आणि दहा वर्षीय तेजसची ओळख पटली. तिचे नातलग तातडीने घटनास्थळी पोहचले. नदीपात्रात उशिरापर्यंत त्यांचा शोध सुरु होता. योगिताने इतके टोकाचे पाऊल का उचलले याबाबत माहिती मिळू शकली नाही.
