शिरपूर : शहरातील गणेश कॉलनी परिसरात किरकोळ वादातून एका तरुणावर कोयत्याने हल्ला करण्यात आल्याची घटना मंगळवारी रात्री घडली. या प्रकरणी संशयिताविरुद्ध शिरपूर शहर पोलिस ठाण्यात गुन्हा दाखल करण्यात आला आहे.
याबाबत पोलिसांकडून मिळालेल्या माहितीनुसार, निलेश नारायण मराठे (वय २१, रा. प्लॉट नं. ५, गणेश कॉलनी, शिरपूर) यांनी दिलेल्या फिर्यादीत म्हटले आहे की, १९ मे २०२६ रोजी रात्री सुमारे १०.४५ वाजेच्या सुमारास गणेश कॉलनी येथे संशयित प्रविण उर्फ दादू संजय मराठे (रा. गणेश कॉलनी, शिरपूर) यास आईला शिवीगाळ का करतो. याबाबत जाब विचारल्याचा राग आल्याने संशयिताने फिर्यादी व त्यांच्या आईला अश्लील शिवीगाळ केली.त्यानंतर संशयिताने निलेश मराठे यांना हाताबुक्यांनी मारहाण करत कोयत्याने डोक्यावर वार करून गंभीर दुखापत केली. तसेच जिवे मारण्याची धमकी दिल्याचे फिर्यादीत नमूद करण्यात आले आहे.
या प्रकरणी शिरपूर शहर पोलिस ठाण्यात गुन्हा दाखल करण्यात आला असून पुढील तपास पोहेकॉ चेतन सोनवणे करीत आहेत.
