शिरपूर : शहरातील आर.सी. पटेल उर्दू विद्यालयात सामाजिक समता सप्ताह विविध उपक्रमांनी उत्साहात साजरा करण्यात आला. या निमित्त विद्यार्थ्यांमध्ये संविधानाबद्दल जागरूकता निर्माण करण्यासाठी विशेष कार्यक्रमांचे आयोजन करण्यात आले.
कार्यक्रमाची सुरुवात भारताच्या संविधानाच्या उद्देशिकेच्या सामूहिक वाचनाने झाली. यावेळी माध्यमिक विभागाचे मुख्याध्यापक डॉ. मुबिनोद्दीन शेख तसेच प्राथमिक विभागाचे मुख्याध्यापक डॉ. इफ्तेखार सैय्यद उपस्थित होते.
डॉ. इफ्तेखार सैय्यद यांनी संविधान उद्देशिकेचे महत्त्व विद्यार्थ्यांना सोप्या भाषेत समजावून सांगितले. तसेच काही विद्यार्थ्यांनी भारतरत्न डॉ. बाबासाहेब आंबेडकर यांच्या जीवनकार्यावर आधारित निबंधांचे वाचन करून त्यांच्या विचारांना अभिवादन केले.
डॉ. मुबिनोद्दीन शेख यांनी भारताचे संविधान तयार होण्यामागील प्रक्रिया आणि त्यामध्ये डॉ. बाबासाहेब आंबेडकर यांनी बजावलेली ऐतिहासिक भूमिका याविषयी विद्यार्थ्यांना मार्गदर्शन केले.
कार्यक्रमाचे सूत्रसंचालन फिरोज कुरेशी यांनी केले, तर आभार प्रदर्शन सादिक कुरेशी यांनी केले. कार्यक्रमाच्या यशस्वी आयोजनासाठी सर्व शिक्षक व शिक्षकेतर कर्मचाऱ्यांनी परिश्रम घेतले.
