शिरपूर (प्रतिनिधी): शिरपूर तालुक्यातील नवे चांदसूर्या गावात अवैध मद्यनिर्मितीचा मोठा पर्दाफाश करत शहर पोलिसांनी एका घरावर छापा टाकून तब्बल १ लाख ७७ हजार ७५० रुपयांचा मद्यसाठा व साहित्य जप्त केले. या कारवाईत एका संशयिताला अटक करण्यात आली आहे.
पोलिसांना नवे चांदसूर्या येथे विक्रीसाठी मोठ्या प्रमाणावर देशी दारू तयार केली जात असल्याची गोपनीय माहिती मिळाली होती. त्यानुसार पोलिस निरीक्षक किशोरकुमार परदेशी यांच्या मार्गदर्शनाखाली १९ मे रोजी सायंकाळी छापेमारी करण्यात आली.
छाप्यात वासर्डीकडे जाणाऱ्या रस्त्यालगत असलेल्या एका घरातून २०० लिटर स्पिरीट भरलेली प्लास्टिक टाकी, ३५ लिटर स्पिरीटचा ड्रम, १६ हजार रिकाम्या प्लास्टिक बाटल्या तसेच खोकी असा मोठा साठा आढळून आला. पोलिसांनी सर्व साहित्य जप्त केले.
या प्रकरणी नितेंद्र पोपटराव पावरा (वय ३८, रा. नवे चांदसूर्या) याला ताब्यात घेण्यात आले असून त्याच्याविरुद्ध गुन्हा दाखल करण्यात आला आहे.
या कारवाईमुळे परिसरात सुरू असलेल्या अवैध मद्यनिर्मितीच्या धंद्याला मोठा धक्का बसला आहे. पुढील तपास पोलिस उपनिरीक्षक दीपक कुशारे करीत आहेत.
