शिरपूर : नागरिकांना अधिक सुरक्षित, पारदर्शक आणि विश्वासार्ह सेवा देण्याच्या उद्देशाने शिरपूर तहसील कार्यालयाने विविध प्रमाणपत्रांच्या स्वरूपात महत्त्वपूर्ण बदल केला आहे. आता तहसील कार्यालयाकडून देण्यात येणारी सर्व प्रमाणपत्रे अर्जदाराचा फोटो आणि क्यूआर कोडसह उपलब्ध होणार असल्याची माहिती तहसीलदार महेंद्र माळी यांनी दिली या सेवेत, उत्पन्न, रहिवासी, नॉन-क्रीमी लेयर आदी प्रमाणपत्रांसाठी ही नवी प्रणाली लागू करण्यात आली आहे. प्रमाणपत्रावरील क्यूआर कोड स्कॅन केल्यास संबंधित प्रमाणपत्राची तत्काळ ऑनलाइन पडताळणी करता येणार आहे. त्यामुळे शासकीय कार्यालये, शैक्षणिक संस्था तसेच इतर संस्थांकडून प्रमाणपत्रांची पडताळणी अधिक जलद आणि सुलभ होणार आहे.
प्रमाणपत्रावर अर्जदाराचा फोटो समाविष्ट केल्यामुळे गैरवापरास आळा बसण्यास मदत होणार आहे. तसेच अर्जदाराचा मोबाईल क्रमांक जोडल्याने अर्जाची सद्यस्थिती थेट मोबाईलवर कळणार असून नागरिकांचा वेळ आणि श्रम वाचणार आहेत.
तहसील कार्यालयाने नागरिकांना प्रमाणपत्रांसाठी अर्ज करताना आवश्यक माहिती अचूक भरून या नव्या सुविधेचा लाभ घ्यावा, असे तहसीलदार महेंद्र माळी यांनी आवाहन केले आहे.
