शिरपूर : तालुक्यातील आदिवासी समाजामध्ये वाढत चाललेल्या व्यसनाच्या प्रमाणाबाबत चिंता व्यक्त करत व्यसनमुक्तीसाठी व्यापक जनजागृती मोहीम उभारण्याचा निर्धार करण्यात आला. आमदार काशिराम पावरा यांच्या मार्गदर्शनाखाली आमदार कार्यालयात आदिवासी संघटनांच्या प्रतिनिधींची महत्वपूर्ण बैठक पार पडली.
बैठकीत समाजामध्ये वाढणारे व्यसन, त्याचे आरोग्य, कुटुंब व सामाजिक जीवनावर होणारे दुष्परिणाम यावर सविस्तर चर्चा करण्यात आली. समाजाला व्यसनाच्या विळख्यातून बाहेर काढण्यासाठी प्रबोधन व संघटित चळवळीची गरज असल्याचे मत उपस्थितांनी व्यक्त केले.
तालुक्याचे लोकप्रतिनिधी म्हणून आमदार पावरा यांनी स्वतः पुढाकार घेत व्यसनमुक्ती अभियान राबविण्याचा निर्धार व्यक्त केला. यासाठी आदिवासी संघटनांनीही सहकार्य करण्याचे आश्वासन दिले. लवकरच तालुकाभर व्यसनमुक्ती जनजागृती अभियान व प्रबोधन कार्यक्रम सुरू करण्यात येणार असल्याचे बैठकीत ठरले.
या अभियानाच्या पुढील नियोजनासाठी १७ मे रोजी सुळे येथे प्रबोधन मेळावा व नियोजन बैठक आयोजित करण्यात येणार आहे.
बैठकीस मनोज पावरा, सुंदरलाल पावरा, भरत पावरा, डॉ. संदीप पावरा, यशवंत पावरा, जगदीश पावरा व जगदीश कनोजे उपस्थित होते.
