नवापूर/नंदुरबार (प्रतिनिधी) कोंडाईबारी घाटातील वनउपज तपासणी नाका चौकीवर वनविभागाने मोठी कारवाई करत अवैधरित्या वाहतूक होत असलेला तब्बल 28 लाख 25 हजार 124 रुपयांचा खैर लाकूडसाठा जप्त केला. या कारवाईमुळे अवैध लाकूड वाहतुकीच्या साखळीला मोठा धक्का बसला आहे.
सहाय्यक वनसंरक्षक, नंदुरबार प्रादेशिक व वन्यजीव विभाग यांना मिळालेल्या गुप्त माहितीनुसार संशयित ट्रक (क्रमांक GJ 17 XX 9955) कोंडाईबारी घाटात अडविण्यात आला. तपासणीदरम्यान वाहनात खैर लाकूड आढळून आले. चालकाने तेलंगणा राज्यातील एनटीपीएस एनओसी सादर केली; मात्र ऑनलाइन पडताळणीत कागदपत्रांमध्ये तफावत आढळली. यानंतर चालक ट्रक सोडून फरार झाला.
जप्त वाहन नवापूर येथील शासकीय विक्री आगारात आणून लाकडाची मोजणी करण्यात आली. त्यात 862 नग, 19.502 घनमीटर खैर लाकूड आढळून आले. वनरक्षक सतीश पदमर यांनी प्रथम अहवाल क्रमांक 02/2025 अन्वये वनगुन्हा दाखल केला असून पुढील तपास सुरू आहे.
सदर कार्यवाही वनपाल सुजित बेडसे, युवराज भाबड, श्रीमती शितल तोरवने वनरक्षक सतीश पदमर, जितेंद्र पवार, रामदास पावरा, देवमन सूर्यवंशी,अनिल वळवी,अमोल गावीत, राहुल गावीत, शिवराम गावीत,वसंत कोकणी,श्रीमती निताली गावीत,कायम वनमजूर, रोजनदारी वनमजूर, वाहचालक यांनी सहभाग नोंदविला.
