शिरपूर/सेंधवा : मध्यप्रदेश-महाराष्ट्र सीमेवरील प्रसिद्ध माँ बड़ी बिजासन धाम मंदिर लवकरच अधिक भव्य आणि दिव्य स्वरूपात भाविकांसमोर येणार आहे. सुमारे पाच कोटी रुपये खर्चून मंदिराचे रजतीकरण करण्यात येणार असून, यासाठी १२१ किलो चांदी आणि सुमारे अर्धा किलो सोन्याचा वापर केला जाणार आहे.
माँ बड़ी बिजासन धार्मिक व पारमार्थिक ट्रस्टतर्फे या महत्त्वाकांक्षी कामास प्रारंभ करण्यात आला आहे. मंदिराच्या गर्भगृहासह देवीचे सिंहासन, दरवाजे आणि प्रवेशद्वारांना चांदी व सोन्याची आकर्षक सजावट करण्यात येणार आहे. पहिल्या टप्प्यात येत्या नवरात्रोत्सवापर्यंत गर्भगृह आणि सिंहासनाचे काम पूर्ण करण्याचे नियोजन आहे.
या रजतसाजामध्ये त्रिशूल, स्वस्तिक, तसेच नवदुर्गांच्या यंत्रांचा समावेश केला जाणार आहे. दुर्गामातेच्या नऊ शक्तींचे प्रतीक म्हणून अंक ‘९’ ला विशेष महत्त्व देण्यात आले आहे.
हे काम Babashri Enterprises या संस्थेकडून केले जात असून, या संस्थेने महाकालेश्वर ज्योतिर्लिंग मंदिर, खजराना गणेश मंदिर आणि सलकनपुर धाम यांसारख्या प्रसिद्ध मंदिरांमध्येही अशा प्रकारची कामे केली आहेत.
मंदिर समितीने भाविकांना ‘तेरा तुझको अर्पण’ या भावनेतून चांदी, रोख रक्कम किंवा इतर स्वरूपात सहकार्य करण्याचे आवाहन केले आहे. मंदिर समितीचे सदस्य मोहन जोशी यांनी, “हे केवळ सौंदर्यीकरण नसून, आईच्या चरणी भक्तिभावाने अर्पण करण्याची संधी आहे,” असे सांगितले.
