शिरपूर /-तालुक्यात गधडदेव शिवारात बनावट देशीदारूचा कारखाना उद्ध्वस्त करून अटक केलेल्या तिघांपैकी एक संशयिताने राज्य उत्पादन शुल्क विभागाच्या ताब्यातूनच पलायन केल्याने एकच खळबळ उडाली आहे. लघवीला जाण्याचा बहाणा करून संशयिताने कार्यालयाच्या कंपाऊंडवरून उडी मारत अंधाराचा फायदा घेत पोबारा केला. या घटनेमुळे उत्पादन शुल्क विभागाच्या सुरक्षा व्यवस्थेवर प्रश्नचिन्ह निर्माण झाले आहे.
मिळालेल्या माहितीनुसार राज्य उत्पादन शुल्क विभागाच्या पथकाने १३ मे रोजी गधडदेव ग्रामपंचायतीच्या हद्दीतील अंबाडुकपाडा शिवारात कोडीद-रामपूर रस्त्यालगतच्या झोपडीत बनावट देशीदारूचा कारखान्यावर छापा टाकत लाखो रुपये किमतीचा मुद्देमालासह संशयित अजयसिंग उजयसिंग उखळदे (२६), मनोहर हिरालाल पिंपळदे (२४) आणि मोगा शिवाजी मुसळदे (२७) यांना ताब्यात घेत गुन्हा दाखल करून तिघांना न्यायालयात हजर केले असता १५ मेपर्यंत पोलीस कोठडी सुनावली.संशयितांना
हाडाखेड नाक्यावरून रात्री साडेअकराच्या सुमारास पळासनेर येथील नवीन लॉकअपकडे नेले जात होते.दरम्यान मोगा मुसळदे याने लघवीला जाण्याची विनंती केली. परवानगी मिळताच त्याने कार्यालयाच्या मागील बाजूच्या कंपाऊंडवरून उडी मारली आणि अंधार व झाडाझुडपांचा फायदा घेत फरार झाला.जवानांनी पाठलाग केला; मात्र संशयित फरार झाला. या घटनेनंतर विभागात एकच खळबळ उडाली असून फरार संशयिताविरुद्ध तालुका पोलीस ठाण्यात स्वतंत्र गुन्हा दाखल करण्यात आला आहे.पुढील तपास पोहेकॉ कोळी करीत आहे.
