शिरपूर : राज्य उत्पादन शुल्क विभागाने तालुक्यातील गधडदेव शिवारात बनावट देशीदारू तयार करणाऱ्या कारखान्यावर धाड टाकून तब्बल ७ लाख ३६ हजार रुपयांचा मुद्देमाल जप्त केला. या कारवाईत तिघांना अटक करण्यात आली आहे.
राज्य उत्पादन शुल्क विभागाला कोडीद-रामपूर रस्त्यालगत कुडाच्या झोपडीत बनावट देशीदारू तयार होत असल्याची गोपनीय माहिती मिळाली होती. त्यानुसार निरीक्षक देविदास नेहूल यांच्या नेतृत्वाखाली पथकाने छापा टाकला.
कारवाईदरम्यान ९० मिलीच्या देशीदारूच्या ५१ बॉक्स, १०० लिटर तयार बनावट देशीदारू, ५०० लिटर शुद्ध स्पिरीट, १८ हजार रिकाम्या प्लास्टिक बाटल्या, बनावट दारू निर्मितीसाठी लागणारे साहित्य आणि एक चारचाकी वाहन असा एकूण ७ लाख ३६ हजार रुपयांचा मुद्देमाल जप्त करण्यात आला.
या प्रकरणी अजयसिंग उजयसिंग उखडे (वय २६), मनोहर हिरालाल पिंपळदे (वय २४) आणि मोंगा शिवाजी मुसळदे (वय २७, तिघेही रा. सुलतानपूर, ता. शहादा) यांच्याविरुद्ध महाराष्ट्र दारूबंदी अधिनियमांतर्गत गुन्हा दाखल करण्यात आला आहे.
संशयितांना शिरपूर न्यायालयात हजर केले असता न्यायालयाने त्यांना दोन दिवसांची पोलीस कोठडी सुनावली.
ही कारवाई दुय्यम निरीक्षक संतोष निकम, एम. डी. पाटील, जवान काशिनाथ गोसावी, प्रतीक्षा भामरे, केतन जाधव, हेमंत पाटील तसेच वाहनचालक रवींद्र देसले आणि निलेश मोरे यांच्या पथकाने केली. पुढील तपास राज्य उत्पादन शुल्क विभाग करीत आहे.
