शिरपूर (प्रतिनिधी) : शिरपूर तालुक्यातील भाटपुरा येथे शॉर्टसर्किटमुळे लागलेल्या आगीत एका शेतकऱ्याचे कापणीसाठी तयार ठेवलेले मका पीक पूर्णपणे जळून खाक झाले. या दुर्घटनेत सुमारे २०० क्विंटल मका, ठिबक सिंचनाच्या नळ्या आणि पीव्हीसी पाइप जळाल्याने अंदाजे सहा लाख रुपयांहून अधिक नुकसान झाल्याचा प्राथमिक अंदाज व्यक्त करण्यात आला आहे.
भाटपुरा येथील शेतकरी प्रवीण गुजर यांनी नाकडीबाई हसराज वजारी यांची साडेतीन बिगे जमीन गहाण तत्त्वावर घेतली होती. तसेच शेजारील गयास पिंजारी यांची साडेतीन बिगे जमीन बटाईने करून एकूण सात बिग्यांवर मका लागवड केली होती.
मका पीक पूर्णपणे तयार झाल्यानंतर त्यांनी कापणी करून कणसे शेतात साठवून ठेवली होती. काही दिवसांतच त्याची वाहतूक करून विक्री करण्याची तयारी सुरू होती. मात्र ९ मे रोजी अचानक झालेल्या शॉर्टसर्किटमुळे शेतात आग लागली. काही क्षणांतच आगीने रौद्ररूप धारण करत साठवून ठेवलेला संपूर्ण मका जळून खाक झाला.
या आगीत मका पिकासह ठिबक सिंचनाच्या नळ्या तसेच शेतासाठी आणलेले २५ ते ३० पीव्हीसी पाइपही नष्ट झाले. त्यामुळे केवळ यंदाच्या हंगामाचे नुकसान झाले नसून पुढील शेती हंगामावरही त्याचा परिणाम होण्याची शक्यता आहे.
या घटनेमुळे प्रवीण गुजर यांच्यावर मोठे आर्थिक संकट कोसळले आहे. शासनाने तातडीने पंचनामा करून योग्य ती आर्थिक मदत द्यावी, अशी मागणी परिसरातील शेतकरी आणि ग्रामस्थांनी केली आहे.
