शिरपूर | प्रतिनिधी
मुंबई-आग्रा राष्ट्रीय महामार्गावर हाडाखेड गावाजवळील गुरुद्वारासमोर प्लायवूडने भरलेल्या ट्रकला रविवारी (११ मे) दुपारी अचानक भीषण आग लागली. काही मिनिटांतच आगीने संपूर्ण ट्रकला वेढा घातल्याने वाहन पूर्णतः जळून खाक झाले. चालकाने प्रसंगावधान राखत वेळीच ट्रकमधून बाहेर पडल्यामुळे मोठी जीवितहानी टळली.
माहितीनुसार, प्लायवूडची वाहतूक करणारा ट्रक मुंबईहून शिरपूरच्या दिशेने येत होता. दुपारी साडेअकराच्या सुमारास हाडाखेडजवळील गुरुद्वारासमोर ट्रकमधून अचानक धूर निघू लागला. चालकाने तत्काळ वाहन रस्त्याच्या कडेला उभे केले आणि खाली उतरला. काही क्षणांतच आगीने रौद्ररूप धारण करत संपूर्ण ट्रकला वेढले.
ट्रकमध्ये मोठ्या प्रमाणात प्लायवूड असल्याने आग वेगाने पसरली. आगीचे स्वरूप इतके भीषण होते की, ट्रकसह सर्व माल जळून खाक झाला. अखेरीस वाहनाचा केवळ लोखंडी सांगाडा शिल्लक राहिला.
घटनेची माहिती मिळताच अग्निशमन दलाचे जवान घटनास्थळी दाखल झाले. त्यांनी अथक प्रयत्न करून आग आटोक्यात आणली. या घटनेमुळे काही काळ महामार्गावरील वाहतूक विस्कळीत झाली होती. शिरपूर तालुका पोलिसांनी वाहतूक सुरळीत करत परिस्थिती नियंत्रणात आणली.
आगीचे नेमके कारण अद्याप स्पष्ट झाले नसले, तरी शॉर्टसर्किटमुळे आग लागल्याचा प्राथमिक अंदाज व्यक्त करण्यात येत आहे. या आगीत ट्रक व मालाचे लाखो रुपयांचे नुकसान झाल्याचे सांगितले जात असून, शिरपूर तालुका पोलीस पुढील तपास करीत आहेत.
